الصفحة الرئيسيةالمحتوى سبت النــــــــور     * هالة الدسوقي   طبعا إحنا المصريين لينا احتفالاتنا الخاصة اللي متلقيهاش في أي مكان في الدنيا أجدادنا الفراعنة اللي أنا بحبهم جدا جدا سبولنا شويه أعياد على عادات بنحب نعملها منها شم النسيم   وقبل يوم شم النسيم والسبت اللي قبله على طول بيطلقوا عليه اسم سبت النور أصله أيه بالظبط والله مش عارفه فرعوني ولا مش فرعوني...   بس كل اللي أعرفه أن والدتي الحبيبة تعرفه جيدا وكمان جيراننا وسبت النور ليه حكاية معانا وإحنا صغيرين   كلنا كنا بنترعب من سبت النور ليه ؟؟؟؟؟؟؟؟؟؟؟؟ -------------  أقولكم يوم سبت النور .. كانت خالتي أم أحمد نعمة .. ودي إحدي جارتنا في الشارع .. وطبعا ابنها أحمد كان بيزعل لما حد بيناديله بأحمد نعمة وعشان كده مكنش حد بيناديله بأحمد نعمة في وشه يعني .. بس من وراه كنا دايما بنقول عليه أحمد نعمة .. ما علينا من أحمد المهم أم أحمد .. وهي قليل ما كانت بتنزل من بيتها أصلا لكن الغريبة إنها في اليوم دا بالذات كانت تتطوع وتحتفل بسبت النور على حسبنا .. إحنا الأطفال الغلبانين إزاي ؟ ------------ أقولكم إزاي ؟ عشان عينينا تنور طول السنة .. لازم في اليوم دا نتكحل بالكحل الحامي... واللي كان مصدره أمي الحبيبة .. فجدتي، الله يرحمها، كانت تمد أمي دائما بالكحل الحامي وهو بعبع العيال الصغيرة .. أنا وأخواتي وولاد الجيران اللي بيعمل غلط ... هاتوا الكحل الحامي اللي مينفذش كلام أمه أو أبوه .. مفيش مشاكل ... أحنا هنحط في عينه كحل حامي اللي يضرب ابن الجيران .. يحطوله الكحل الحامي وهكذا أصبح الكحل الحامي عقاب لكل عاصي وفي اليوم دا بالذات .. كنا بنتعاقب كلنا أولاد وبنات على حاجة معملنهاش بالكحل الحامي بالنسبة لنا عقاب .. بالنسبة لأمهاتنا حماية ضد أمراض العيون    -----------------   وتبدأ المأساة .. طاطاطططططططططططططططا خالتي أم أحمد الله يمسيها بالخبر بقى تقف على أول البيت بتاعها اللي هو قصاده البلكونة بتاعتنا .. وطبعا المشهد كان بيبقى رائع من بلكونتنا بس مهما نضحك على العيال .. كانوا برده بيضحكوا علينا المهم اوصفلكم المشهد كل أم جاية لخالتي أم أحمد .. كلكوا عرفتوها طبعا .. وفي أيدها ولادها بعد مطارده عجيبة في أرجاء شارعنا يصرخون ويفلفصون .. جاية من فلفص أي إفلات ولكن هيهات .. مهما الواحد يجري .. هيتكحل يعني هيتكحل والأم تمسك عين ابنها او بنتها وتفتحتها بالعافية وطبعا الفلفصة شغاله وخالتي ام احمد تحط الكحل .. واللي يخلص يقعد على جنب ويعيط وطبعا لو فتح عينيه توجعه اكتر فيفضل قافلها مدة لغاية لما الوجع يروح ودا يركن ويجي اللي بعده وهكذا والأمهات فرحانين جدا .. والعيال يعيطوا ------------  بس المشكلة دائما كانت عند الصبيان .. عشان بمناظرهم دي كانوا مضحكة لينا إحنا البنات ونفضل نضحك عليهم لغاية لما الكحل يخلص من عينيهم وطبعا هما غلابة .. وقليل ما بيكون الصبيان غلابة يعني ... يدارو اليومين دول ولا يطلعوا البلكونة ولا ينزلوا الشارع ... عشان الكحل وطبعا الجبروت الأموي .. جاية برده من كلمة أم هو اللي غالبا كان بينتصر .. والأولاد والستات كله في اليوم دا بيبقى شكلهم غريب العيال مكحلة وبتعيط ... غصب عنها طبعا والستات برده بتعيط بس بس بخاطرها .. أي عن رضا منها .. هما اللي حطوا لنفسهم الكحل مش حد تاني بصراحة كان بيبقى يوم منور على الأخر والطوارئ دايما كانت بتعلن في شارعنا والله ذكريات حلوة كل سبت نور وعيد نسيم وإنتم   * اعلامية مصرية   تاريخ التحديث :- توقيت جرينتش :       الأحد , 19 - 4 - 2009 الساعة : 2:34 مساءً توقيت مكة المكرمة :  الأحد , 19 - 4 - 2009 الساعة : 5:34 مساءً  التعليقــات : 8 تعليق   مسلسل : 8   /   الراسل : هند    /   الدولة : - - - - تاريخ التعليق : الأحد , 19 - 4 - 2009 الساعة : 10:16 صباحاً كل عام ومصر بخير فكرتينا بالذى مضى والله يا هالة ربنا يرحم الاموات كلهم ويعودها على مصر كلها بخير مسلسل : 7   /   الراسل : نبيل فوزى بولس   /   الدولة : مصر تاريخ التعليق : الاثنين , 20 - 4 - 2009 الساعة : 5:17 صباحاً خالتى ام هالة اصل سبت التور لو انتى مش عارفةادخلى على جوجل واكنبى كلمة سبت النور او كلمة النور المقدس و ستعرفىى اصل سبت النور مسلسل : 6   /   الراسل : هنا   /   الدولة : - - - - تاريخ التعليق : الاثنين , 20 - 4 - 2009 الساعة : 6:43 صباحاً سئ جدا ايه الاسلوب الزفت ده اسلوب الكاتبه هباب ايه ده مش كده ماتختاروا ياحماعة مواضيعكم ..مش كل حد تاخدوا له شوية رغي ويتقال عليه مقالة وباسم الاعلامية مش عارف مين !!!!!!! مسلسل : 5   /   الراسل : فلفل   /   الدولة : مصر تاريخ التعليق : الأحد , 3 - 5 - 2009 الساعة : 11:37 صباحاً فعلا فعلا فى عادات مصرية بنقوم بيها لمجرد انها عادة رغم ضررها النفسي والجسمانى نوعا ما. من ناحية تانية اكتر حاجة عجبتنى" الجبروت الأموى" مسلسل : 4   /   الراسل : نانسي عجرم   /   الدولة : مصر تاريخ التعليق : الأحد , 3 - 5 - 2009 الساعة : 12:39 صباحاً معجبة مغرمة على فكرة فعلاً فى حاجات كانت بتحصل من زمان واحنا اتعودنا عليها زى مثلا شم النسيم ماهو عادة. بس الموضوع جميل وبيفكرنا بعادات قديمة..ياريت محيط يهتم بهذه النوعية من المواضيع الغائبة عنا. مسلسل : 3   /   الراسل : مصرى مسلم .... بس بحب الناس كلهم    /   الدولة : - - - - تاريخ التعليق : الأحد , 10 - 5 - 2009 الساعة : 10:34 صباحاً ذكريات جميله انا بشكر الاخت هاله ...... واللي بيقول سيئ وحورات بقله خليك فى حالك ، والاخ بتاع سبت النور وجوجل ... ربنا يشفى ويهدى الاخت هاله لكى منى اجمل تحيه هذا الموضع او الاحتفال بسبت النور كثيرا ما رايناه قديما لكنى لم اكن من المحظوظين الذي ذاقت اعينهم الكحل الحامى ، لانهم كانو بيخافوه يمسكونى وعلى كلامهم ان ايدي طرشه مع انى كنت اصغر جسم فى الحاره بس تقولى ايه بقى اتقى شر من اقترب من الارض عندنا فى الريف كانو بيعملوه كدا علشان عاده ورثوه من الاجداد واحتفال بالربيع ، بس انا لاحظت ان فى الفتره دى بتكثر امراض العيون بسبب حبوب لقاح النباتات اللي بتفتح براعمها فى اول الربيع والكحل دا كان احسن علاج وحمايه لمرض العين اللي كان بيحصل فى الاوقات دى من كل سنه ، انا مش بتفلسف ولا بقول كلام من الهوى بس انا بحي الاخت هاله على الموضوع الجميل ده وطريقة السرد اللطيفه دى للحكايه ..... مع تحياتى من دبي اللي بيقول الكتابه وطريقة الحكايه ققوله يا عم المعلم دى هاله يعني مش المنفلوطى ولا العقاد ولا احسان عبد القدوس علشان تحترف الكتابه مسلسل : 2   /   الراسل : علاء   /   الدولة : - - - - تاريخ التعليق : الثلاثاء , 6 - 10 - 2009 الساعة : 9:57 صباحاً مش رغي فاضي لاسمح الله الماضي يلزكريات الجميلة مش ممكن يتنسي لازم نفتكر الماضي بكل مافي من اشياء جميلة ونشوف ونقيم سلوكياتنا هل كانت صح نستمر فيها ولا غلط نغيرها او نعدل فيها واسلوبنا في النقد لازم يكون افضل من كيدي يعني الكتاب الكبار في بداياتهم معظمهم عليهم انتقادات اشكرك ياهاله علي موضوعك والي الافضل ان شاء الله مسلسل : 1   /   الراسل : عبد الغفار شهاب   /   الدولة : - - - - تاريخ التعليق : الثلاثاء , 27 - 10 - 2009 الساعة : 8:10 مساءً سبت النور اين دهب ما نراه اليوم فى شوارع وازقة مصر يدعونا الى التمنى ان يعود سبت النور كيفما شاء اتزكر ان يوم سبت النور عندما كان يوما يحتفل به بصرف النظر عن انا عيدى للمسيحيين او المسلمين ومع تمسك كلاهما بدينه وعاداته وبنفس الوقت بالتعايش الجميل بدون اى تحفظات من كلا الجانبين كنا نجد شوارعنا نظيفه ومضاءه بالشموع بقدرة قادر حيث كانت الامهات(كل الامهات)الى تنظيف ما يجاوره من الشارع واضاءة الشموع انتظارا لقيامة المسيح عند المسحيين وكعاده لايعرف معناها غالبية المسلمين ولكن ايا كان موقع هدا العيد فقد كنا نلمس شئ جديد فى شوارعنا وبيوتنا حيث يظل النور مضاء بالبيوت كل البيوت ليلا فنرى شوارعنا نظيفه على غير عادتادها اتمنى ان نعود اهداالزمن الجميل يوم كنا لا نفرق بين ابناء الوطن الواحد من منهم مسلم ومن منهم مسيحى رحم الله زمان   أضف تعليقك على الموضوع : المشاركات المنشورة لا تعبر عن رأى "محيط" وانما تعبر عن رأى الأعضاء المشاركين فيها  *الاسم  *عنوان التعليق  *نص التعليق  العلامة (*) تعنى ان الحقل مطلوب		النشرة الإخبارية العالم من الداخل اختر الدولة  مصر  السعودية  ليبيا  الكويت  البحرين  عمان  الأردن  أريتريا  لبنان  سوريا  اليمن  قطر  العراق  المغرب  موريتانيا  السودان  الصومال  جيبوتى  تونس  الجزائر  فلسطين  الامارات  أفريقيا  أسيا  اوروبا  الأمريكتان استراليا أبواب محيط أخبار اقتصاد رياضة مرأة سيارات دين ثقافة فن كمبيوتر واتصالات علوم وتكنولوجيا عالم الكتاب سياحة حوادث خدمات محيط فرصة عمل البورصات مناقصات دليل الفضائيات اسعار العملات مواقيت الصلاة طقس اليوم مشاركات القراء العالم بين يديك أبواب متميزة منتديات محيط جديد حصاد اليوم ملفات حوارات استراحة أوتار القلوب كعب عالى شيف نودة شخصيات لا تنسى شعر وشعراء العالم بين يديك